மதுரை அரசு ராஜாஜி மருத்துவமனை வளாகத்தில் நடிகர் சூரி மற்றும் அவரது குடும்பத்தினருக்கு சொந்தமான ‘அம்மன் உணவகம்’ செயல்பட்டு வருகிறது. சமீபத்தில், இந்த உணவகத்தை சீல் வைக்க வேண்டும் என்று சமூக ஆர்வலர் மற்றும் வழக்கறிஞர் முத்துக்குமார் மதுரை மாவட்ட ஆட்சியரிடம் புகார் அளித்துள்ளார்.
புகாரில், உணவகம் அனுமதிக்கப்பட்ட 434 சதுர அடியை மீறி, மேலும் 350 சதுர அடியில் நிரந்தர ஷெட் அமைத்து, 360 சதுர அடியில் திறந்த வெளி ஆக்கிரமிப்பு செய்துள்ளதாக குற்றம் சாட்டப்பட்டுள்ளது. மேலும், செவிலியர் விடுதியில் கழிவுநீர் தொட்டிகளின் அருகில் காய்கறிகள் வெட்டுதல், உணவு சமைத்தல், பேக்கிங் போன்ற பணிகள் நடைபெறுகின்றன; இது சுகாதார நெறிமுறைகளை மீறுவதாக கூறப்படுகிறது.
அதேபோல், பெருச்சாளி, கரப்பான் பூச்சி போன்றவை உள்ள இடத்தில் உணவு தயாரிப்பதால், நோய் தொற்று ஏற்படும் அபாயம் உள்ளது என்றும் புகாரில் குறிப்பிடப்பட்டுள்ளது. இந்த நிலை தொடர்ந்தால், உயர்நீதிமன்றத்தில் வழக்கு தொடரப்படும் என்று முத்துக்குமார் எச்சரித்துள்ளார்.
இவ்வாறு, சுகாதார நெறிமுறைகளை மீறி செயல்படுவதாக கூறப்படும் ‘அம்மன் உணவகம்’ மீது நடவடிக்கை எடுக்கப்படுமா என்பது கவனிக்கப்பட வேண்டிய விஷயமாக உள்ளது.
