தமிழ் சினிமாவின் முன்னணி நடிகரும் தமிழக வெற்றிக் கழக தலைவருமான விஜய், தனது கட்சியின் கொடி மற்றும் கட்சியின் பாடலை இன்று வெளியிட்டார். சென்னை பனையூரில் உள்ள தனது கட்சி அலுவலகத்தில் நூற்றுக்கணக்கான ரசிகர்கள், கட்சித் தொண்டர்கள் மற்றும் கட்சி நிர்வாகிகளின் முன்னிலையில் கட்சிக் கொடி மற்றும் பாடலை வெளியிட்டார்.
தமிழ் தாய் வாழ்த்துடன் தொடங்கிய இந்த நிகழ்வில் கொடியை அறிமுகம் செய்வதற்கு முன் அனைவரும் உறுதிமொழி ஏற்றனர்.
த.வெ.க. உறுதிமொழி
“நமது நாட்டின் விடுதலைக்காகவும், நமது மக்களின் உரிமைகளுக்காகவும், தமிழ் மண்ணில் இருந்து தீரத்துடன் போராடி உயிர்நீத்த எண்ணற்ற வீரர்களின் தியாகத்தை எப்போதும் போற்றுவேன்.
நமது அன்னைத் தமிழ் மொழியைக் காக்க உயிர்த் தியாகம் செய்த மொழிப்போர் தியாகிகளின் இலக்கை நிறைவேற்றும் வகையில் தொடர்ந்து பாடுபடுவேன்.
இந்திய அரசியல் அமைப்பு சட்டத்தின் மீதும் இறையாண்மை மீதும் நம்பிக்கை வைத்து அனைவருடன் ஒற்றுமை, சகோதரத்துவம், மத நல்லிணக்கம், சமத்துவம் ஆகியவற்றைப் பேணிக் காக்கின்ற பொறுப்பு உள்ள தனிமனிதராகச் செயல்படுவேன்.”
“மக்களாட்சி, மதச்சார்பின்மை, சமூக நீதி பாதையில் பயணித்து என்றும் மக்கள் நல சேவகராகக் கடமையாற்றுவேன் என உறுதி அளிக்கிறேன்.
சாதி, மதம், பாலினம், பிறந்த இடம் ஆகியவற்றின் பேரில் உள்ள வேற்றுமைகளைக் கலைந்து, மக்களிடையே விழிப்புணர்வை ஏற்படுத்தி, அனைவருக்கும் சமவாய்ப்பு, சம உரிமை கிடைக்கப் பாடுபடுவேன்.
பிறப்பொக்கும் எல்லா உயிர்க்கும் என்ற சமத்துவக் கொள்கையைக் கடைபிடிப்பேன் என்று உளமாற உறுதி கூறுகின்றேன்” என்ற உறுதிமொழியை விஜய் வாசிக்க அவரது கட்சித் தொண்டர்கள் அதை உறுதிமொழியாக ஏற்றுக்கொண்டனர்.
த.வெ.க. தலைவர் விஜய் பேச்சு
இந்நிகழ்வில் பேசிய நடிகர் விஜய், ” நம் அனைவருக்கும் இது சந்தோஷமான நாள். நான் என்னுடைய அரசியல் பயணத்தின் தொடக்கப்புள்ளியாக கட்சியின் பெயரை கடந்த பிப்ரவரியில் அறிவித்தேன். அன்றையிலிருந்தே நீங்கள் அனைவரும் ஒரு குறிப்பிட்ட நாளை எதிர்ப்பார்த்துக் கொண்டிருக்கிறீர்கள் என்பதை நான் அறிவேன். அது நமது முதல் மாநில மாநாடு.
என் நெஞ்சில் குடியிருக்கும் என்னுடைய தோழர்கள் ஆகிய உங்கள் முன்னிலையிலும் சரி… என் நெஞ்சில் குடியிருக்கும் தமிழ்நாட்டு மக்கள் முன்னிலையிலும் சரி.. கொடியை அறிமுகம் செய்வதை நான்மிகவும் பெருமையாக நினைக்கிறேன்.
இதுவரையில், நாம் நமக்காக உழைத்தோம். இனி வரப்போகும் காலங்களில் கட்சி ரீதியாக நம்மை தயார்படுத்திக் கொண்டு, தமிழ்நாட்டிற்காகவும் தமிழ்நாட்டு மக்களின் உயர்வுக்காகவும் நான் அனைவரும் ஒன்றோடு இணைந்து உழைப்போம்.
புயலுக்குப் பின் அமைதி, ஆர்ப்பரிப்பு , ஆரவாரம் என்பதைப்போல.. நமது கட்சி கொடியின் பின்பும் ஒரு சுவாரசியமான வரலாறு ஒன்று உள்ளது. அதுஎன்ன என்பதை, நீங்கள் அனைவரும் எதிர்பார்த்துக் காத்துக் கொண்டிருக்கும் நாளில் (மாநில மாநாடு) தெரிவிக்கிறேன். கட்சியின் கொள்கைகள், செயல் திட்டங்கள் என்ன என்பது குறித்தான விளக்கத்தையும் நாங்கள் அன்று தெரிவிக்கிறோம். அதுவரையிலும் மகிழ்ச்சியாக, கெத்தாக நாம் இந்த கொடியை ஏற்றிக் கொண்டாடுவோம். இது நமது கட்சிக்கான கொடியாக மட்டும் நான் பார்க்கவில்லை.. தமிழ்நாட்டின் வருங்கால தலைமுறைக்கான வெற்றிக்கான கொடியாகத்தான் நான் பார்க்கிறேன். இந்தத் கொடியை உங்களின் இல்லத்தில் உள்ளத்தில் நான் கூறாமலே… நீங்கள் அதை ஏற்றுவீர்கள் என்று எனக்கு தெரியும்.. இருப்பினும், முறையான அனுமதிப்பெற்று, அனைவரிடமும் தோழமை பாராட்டி நாம் இதை ஏற்றிக்கொண்டாடுவோம். அதுவரையிலும், தன்னம்பிக்கையுடன் இருங்கள்!! நல்லதே நடக்கும்!! வெற்றி நிச்சயம்!!! மீண்டும் சந்திக்கும் வரை… நன்றி வணக்கம்.” என்று பேசினார்.
த. வெ.க. கொடியின் முக்கிய அம்சங்கள்
கட்சிக்கொடி சிவப்பு, மஞ்சள் என இரண்டு நிறங்களைக் கொண்டுள்ளது. நடுவில் உள்ள மஞ்சள் நிறப் பட்டையில் இரண்டு ஆண் யானைகள் இடம் பெற்றுள்ளன.
நடுவில் இடம் பெற்றிருக்கும் சிவப்பு நிற வட்டத்தில் வாகை மலரும் அதைச் சுற்றி நட்சத்திரங்களும் இடம் பெற்றுள்ளன. 28 நட்சத்திரங்களில் 5 நட்சத்திரங்கள் நீல நிறத்திலும், இதர நட்சத்திரங்கள் பச்சை நிறத்திலும் இருப்பது போன்று வடிவமைக்கப்பட்டுள்ளது.
நடிகர் விஜய் கடந்த பிப்ரவரி மாதம் தமிழக வெற்றிக் கழகம் என்ற கட்சியைத் துவங்கி அதிகாரப்பூர்வமாக அறிவித்தார். டெல்லியில் உள்ள இந்திய தேர்தல் ஆணையத்தில் அக்கட்சியின் பொதுச்செயலாளர் என்.ஆனந்த் அக்கட்சியைப் பதிவு செய்தார்.
தமிழ்நாட்டில் 2026ஆம் ஆண்டு நடைபெற இருக்கும் சட்டமன்றத் தேர்தலில் போட்டியிடுவதை இலக்காகக் கொண்டு தமிழக அரசியலில் களம் இறங்கியுள்ளது விஜயின் கட்சி. விடுதலை சிறுத்தைகள் கட்சியின் தலைவர் திருமாவளவன், நாம் தமிழர் கட்சியின் தலைவர் சீமான், தமிழ் மாநில காங்கிரஸ் கட்சியின் தலைவர் ஜி.கே.வாசன் ஆகியோர் நடிகர் விஜய்க்கு தங்களின் வாழ்த்து தெரிவித்துள்ளனர்.
